Cumo Quien Reza i Pide Perdon

Alfredo Calmeirão, Associaçon de la Lhéngua i Cultura Mirandesa

Cumo Quien Reza i Pide Perdon

Alfredo Calmeirão, Associaçon de la Lhéngua i Cultura Mirandesa

Deixai que bos diga l que sei de las Ties, Mais, Mulhieres, Filhas, Armanas de la Tierra de Miranda. Deixai-me falar-bos de las mirandesas que nun pudírun ser Dançadoras nien bestir Capa d’Honras, ls dous atos más eidantitários de la Tierra que ye deilhas;. dezir-bos de las ties de mil-manos para l oufício diário d’eisistir, las duonhas de l trabalho anté l fin de l Tiempo, las ties que bibírun na tierra i a quien la tierra sembrou de rastros de suonhos i de selombras de risas. Ties cumo páixaros: sbolácian nun cielo scampado i ténen ne ls uolhos la serena lhuç de l sol; ties cumo froles: perfúman ls dies q’atrabéssan, agudas, quaije guapas, quaije deseadas, quaije felizes. Dezir-bos de las ties que nácen, bíben i se muorren chupadas puls funiles de l trabalho, de l delor ou de l pasmo. De las ties que parírun l quemer de ls canhones i de las frunteiras, las que stiercan la tierra cun lhágrimas calhadas i cólhen ua fome eiterna d’amor. Las ties anchadas de choro, que an porciçones de belas i d’ourtigas, acáman ls fruitos berdes de ls sous bientres benditos an catres de tierra dura.

Ou de las mulhieres de l miu tiempo, spantalhadas ne ls pequeinhos lhugares bazius de gente i de spráncia que gástan ls dies a tecer la solidon, a spera de suabes milagres.

Mentes i nó, todas estas ties, tu, mirandesa, çcalça, znuda, rebaixada, bancida, siempre tubiste an ti la semiente que purpara l feturo. La semiente i la raiç. Fuste siempre la guardadora de l’arca de la spráncia que biaja scundida, l giç branco que, na parede negra de l tiempo, risca las palabras nuobas que se screbírun onte i se han de screbir manhana, apuis, deiqui a mil anhos. Porque palabras cumo Lhibardade, Justícia, Eigualdade, Fraternidade, Paç, Alegrie, Amor ténen que se screbir to ls dies an to ls lhugares. Siempre. Para siempre. Para apagar l sangre arramado, ls suonhos çfazidos, las bidas sbarrulhadas.

Mentes i nó, sien fazer causo, aquemodados, ambudados, ambuznados… cuntinamos a eisistir.

Mentes i nó, las guerras cuntínan.

Mentes i nó, la raiba crece.

Mentes i nó, l’eigualdade i la justícia son froles d’anfeite que bében las lhágrimas que te scuorren.

Mentes i nó, acuquelhado de culpa i houmildado, a pansar an bós, Mirandesas, Ties, Mais, Mulhieres, Filhas, Armanas, an todas las Ties, scribo i dou-bos estas palabras.

Cumo quien reza i pide perdon.

2018-09-22T11:11:12+00:00

Leave A Comment